هية البنات بتعنس ليه؟
بقلم: حبيب الملايين
عاوز عروسة عينيها خضرا وشعرها
اصفر…او عقلية علمية معملية فذة… عاوزها شبه نانسي عجرم ولا هيفا…. ده كان
زمان… الزمن اللي الراجل كان هو اللي بيختار الست اللي هيتجوزها…وياعيني
اهلها هما اللي بيقرروا ليها اذا كان الراجل مناسب او لا…الراجل
المناسب
زمان كان بيبقى واحد عنده شقة وبيشتغل شغلانة كويسة وشكله مقبول
وخلاص…الوضع دلوقتي اختلف… لو واحد في المواصفات دي كلها اتقدم لواحدة
دلوقتي ممكن جدا ترفضه…لان المواصفات دلوقتي اختلفت لان البنات
اختلفوا…البنت بقت مثقفة ومتعلمة وبتشغل مناصب قيادية كمان… فمبقاش الراجل
ابو شقة ولا حتى عربية هو فارس احلامها…البنت بقت عاوزة واحد على نفس
المستوى بتاعها… يمكن ده اللي مخلي فيه ازمة في الجواز….وده اللي مخلي
بنات كتير بتوصل لسن كبير من غير جواز وبيكون اتقدملها رجالة كتير بس مش
مناسبين…. المشكلة ان المجتمع بيحاسبها على عدم الجواز من اي حد والسلام
كأن العيب فيها…من غير ما يفهموا ان البنت دلوقتي بقت مستقلة وناضجة و
مثقفة ومش عاوزة تتجوز لمجرد الجواز وخلاص…. هي كمان محتاجة تختار شريك
حياتها صح….الناس مش بتعيب على الولد لما يختار من ميت بنت بس لما تيجي
البنت تختار الولد يقولوا عليها كلام ميتقلش…. مش ذنبها انها مش لاقية حد
مناسب ومش ذنبها ان المش مناسب من وجهة نظرها مناسب جدا من وجهة نظر
الناس… دي حياتها هي وهي اللي هتعيشها مش حد تاني يبقى هي اللي لازم تختار…
انا
اعرف بنات كتير جدا جدا ويمكن تقريبا معظمهم بيعانوا من المشكلة دي…
بيعانوا من نظرة المجتمع ليهم بانهم لازم يرضوا بأي عريس يتقدملهم قبل ما
يعنسوا كمان بيعانوا من نظرات الناس ليهم كل ما يقربوا من التلاتين… مفيش
حد من الناس دول فكر انهم يلوموا الولاد بدل ما يلوموا البنات… ايوة
الولاد مستغربين ليه… اصلهم لو كانوا كويسين ومش تافهين كان زمانهم
اتجوزوا من بدري و رحموا المساكين دول من اللي بيعانوا منه….
فيه ناس بتقول ان مصر فيها عنوسة…. او بمعنى تاني ان مفيهاش جواز…وفيه ناس
بتفتي وتقولك ان عدد البنات اكبر من الولاد ومفيش ولاد كفاية يكفوا البنات
دول كلهم…احب اقول للناس دول ان مصر فيها ازمة رجالة مش ازمة بنات….زمان
كانوا بيقولوا على البنات انها تافهة وتفكيرها سطحي لكن دلوقتي اللي حصل
العكس…الولاد هما اللي بقوا تافهين وتفكيرهم سطحي… واللي مش تافه منهم
برده مش بيكون في نفس المستوى الفكري للبنت اللي بيتقدملها…البنات هيعملوا
ايه يعني….فيه واحدة من اللي اخدوا لقب عانس قالتلي مرة ” ذنبي ايه ان كل
اللي بيتقدمولي تُحَف… الناس ليه فاكرة ان العيب فيا؟!”"
قولولي بقى واحدة زي دي وغيرها كتير ذنبهم ايه؟!
